حوزہ نیوز ایجنسی کی رپورٹ کے مطابق، اسلام آباد نیشنل پریس کلب کے سامنے جاری دھرنے سے مجلس وحدت مسلمین کے وائس چیرمین علامہ سید احمد اقبال رضوی نے خطاب کرتے ہوئے کہا کہ زمانہ جاہلیت میں چھوٹے چھوٹے مسائل پر جنگیں ہوتی تھیں اور قتل عام شروع ہو جاتے تھے۔ افسوس آج ہمارے ملک میں بھی زمانہ جاہلیت کی طرح چھوٹے سے کسی مسئلے پر لڑائی شروع ہوتی ہے جو کئی کئی دن جاری رہنے سے جنگ میں بہت سی جانیں ضائع ہوتی ہیں۔ یہ حکومت کی نااہلی ہے۔
انہوں نے مزید کہا کہ حکومتی ناقص کارکردگی کی وجہ سے لاکھوں افراد کی جانیں خطرے میں ہیں۔مجلس وحدت مسلمین مطالبہ کرتی ہے کہ پاراچنار میں زمینوں کے تنازعات کو مستقل بنیادوں پر حل کیا جائے اور روڈ کو محفوظ بنایا جائے۔
دھرنے سے علامہ سید تجمل حسین الحسینی نے کہا کہ ہم ضلع کرم میں امن وامان کے لئے طرفین کے ساتھ بیٹھنے کو تیار ہیں ہم چاہتے ہیں کہ ضلع کرم کے اہلسنت اور اہل تشیع آپس میں بیٹھ کر مسائل کا حل نکالیں۔
کرم یکجہتی کمیٹی کے ترجمان سر شبیر ساجدی نے امن وامان کے صورتحال پر تشویش کا اظہار کرتے ہوئے اس پر انتہائی افسوس اظہار کیا ہے اور ارباب اختیار سے اس مسلے کو سنجیدہ لیتے ہوئے فوری حل پر زور دیا۔
